ADHERIRSE Á CAMPAÑA

#seresentir é unha campaña e programa de actividades con motivo da conmemoración do 28 de xuño, Día Internacional do Orgullo LGTBQIA+. Apela directamente á implicación dos concellos da provincia, estendendo o chamado á acción a calquera outra entidade do tecido social, educativo, empresarial, familias, etc.

Aqueles concellos e entidades interesadas en adherise á campaña e ao programa de actividades poden facelo, amosando o seu compromiso e vontade de celebrar a LIBERDADE DE SER E SENTIR.

PROGRAMA 2025

Conversa sobre a institucionalización das persoas LGBTQIA+

Interveñen: Rosa Rilo, terapeuta ocupacional e Ignacio Igrexas, traballador social

Data: 23 de xullo de 2025 ás 17:00

Lugar: Museo Terra de Xallas-Santa Comba

As persoas e familias ao longo da súa biografía teñen multitude de situacións nas que están en relación directa con institucións de coidado, educación, saúde, etc. As persoas que pertencen ao colectivo LGBTQIA+ están expostas a situacións que poden ser complexas pola inadecuación do funcionamento das organizacións aos seus dereitos sexuais.

Nesta conversa repasaremos as situacións nas que a orientación e a identidade sexual non están previstas ou contempladas correctamente. Buscaremos solucións e estratexias para avanzar na atención das persoas ou familias LGBTQIA+ nos recursos institucionais e abordaremos as vantaxes e desvantaxes dos recursos de atención específicos.

Palestra sobre corpos e disidencias sexuais

Interveñen: June Fernádez, escritora, xornalista e consultora en comunicación, especializada en feminismo e diversidade sexual. Fundadora da revista Píkara Magazine e Mario Brión (Olaxonmario) publicista, creador de contido, remeiro e docente.

Data: 15 de xullo de 2025

Lugar: Concello de Boiro

Mario e June conversan sobre quen define que é un corpo válido ou desexable e como as normas de xénero, raza, capacidade ou tamaño operan sobre os corpos. Abordan cuestións como a hipersexualización e fetichización dos corpos disidentes e reflexionan sobre a sexualidade como ferramenta de control ou sobre como son tratados nos medios os corpos e sexualidades disidentes. En definitiva, o diálogo achéganos ás dinámicas de poder que rodean aos corpos e á sexualidade, tanto na súa normalización como na súa disidencia.

Palestra sobre Medidas para a igualdade e non discriminación das persoas LGTBIQA+ no ámbito laboral

Relator: Miguel Vieito, avogado experto en asesoramento e acompañamento a persoas do colectivo LGBTIQA+

Data: 26 de xuño de 2025

Lugar: Escolas do Xardín Agra de Caldas na Rúa Desiderio Varela de Carballo

Miguel Vieito ofrécenos unha visión xurídica sobre as medidas de protección contra a discriminación laboral por motivos de orientación ou identidade sexual, facendo especial referencia á Lei de igualdade de trato e á Lei Trans. Destaca que estas leis establecen mecanismos importantes para combater a discriminación, así como interesantes accións de fomento do emprego, medidas que teñen o potencial de mellorar significativamente a inclusión laboral do colectivo, pero que precisamos sexan implementadas para que poidan ter un impacto real.

ACTO SIMBÓLICO 28 DE XUÑO

A Deputación da Coruña, desde a súa Área de Igualdade, propón levar a cabo un acto simbólico no que participen todas as entidades adheridas á campaña #seresentir.

Este acto ten por obxectivo conmemorar o Día Internacional do Orgullo LGTBQIA+, unha xornada para reivindicar a diversidade, a igualdade e os dereitos de todas as persoas, independentemente da súa orientación sexual, identidade ou expresión de xénero. Así, proponse a lectura dun manifesto que avoga polo dereito a vivir con dignidade e liberdade, apostando por dar visibilidade ao colectivo LGTBQIA+ na cultura, nos medios, no deporte, no rural e en todos os espazos sociais.

Pretende ser unha chamada á toda a sociedade, para reivindicar, con orgullo, a LIBERDADE DE SER E SENTIR.

Descarga o manifesto #seresentir, a guía para a realización do acto simbólico e/ou a intervención de Soledad Agra Tuñas, deputada de igualdade, no acto conmemorativo celebrado no Pazo Provincial o 27 de xuño.

DECLARACIÓN INSTITUCIONAL

DESCARGA AQUÍ
PDF. 0.4MB

liberdade de ser e sentir

En Galiza, os principios de liberdade e igualdade aparecen recollidos no Estatuto de autonomía, no seu artigo 4.2 recolle a obriga que corresponde aos poderes públicos de «promover as condicións para que a liberdade e a igualdade das persoas e dos grupos en que se integran sexan reais e efectivas, remover os atrancos que impidan ou dificulten a súa plenitude e facilitar a participación da cidadanía galega na vida política, económica, cultural e social».

A lexislación internacional sobre dereitos humanos e múltiples tratados internacionais consagran a igualdade como un principio xurídico fundamental e universal. Desde a Declaración Universal dos Dereitos Humanos, que establece que «toda persoa ten os dereitos e as liberdades proclamados nesta declaración, sen ningunha distinción de raza, cor, sexo, idioma, relixión, opinión política ou de calquera outra índole, orixe nacional ou social, posición económica, nacemento ou calquera outra condición», numerosos textos sobre dereitos humanos e múltiples tratados consideran a igualdade das persoas como un principio xurídico fundamental e universal.

#seresentir

#DeputacióndaCoruña

CAMPAÑAS ANTERIORES

2024   2023