ADHERIRSE Á CAMPAÑA

#seresentir é unha campaña e programa de actividades con motivo da conmemoración do 28 de xuño, Día Internacional do Orgullo LGTBQIA+. Apela directamente á implicación dos concellos da provincia, estendendo o chamado á acción a calquera outra entidade do tecido social, educativo, empresarial, familias, etc.

Aqueles concellos e entidades interesadas en adherise á campaña e ao programa de actividades poden facelo, amosando o seu compromiso e vontade de celebrar a LIBERDADE DE SER E SENTIR. 

Compromiso de adhesión

O concello ou entidade á que represento, amosa o seu compromiso e vontade de unirse á campaña #seresentir.

Comprométome a:

# Difundir os contidos dixitais da plataforma web seresentir.gal a través das redes sociais, da web ou de calquera outro recurso que se estime oportuno.

# Empregar os cancelos #seresentir e #DeputacióndaCoruña nos perfís sociais coa finalidade de sensibilizar, concienciar e reivindicar o día da diversidade sexual.

# Inserir na web, redes ou calquera outro soporte dixital, un báner co deseño da campaña que redirixa ao contido da plataforma web seresentir.gal. Os materiais de difusión están dispoñibles en seresentir.gal (materiais de difusión).

# Apoiar a campaña trasladándoa á sociedade e fomentando a participación do diferente tecido asociativo, empresarial, sanitario, educativo, etc., existente no concello.

# Informar sobre outras entidades locais que realicen actividades de sensibilización ou presten servizos relacionados co colectivo LGTBQI, así como en materia de promoción da igualdade ou prevención da violencia de xénero, co fin de poder incorporar ditas entidades á campaña e seguir xerando rede.

# Colocar a bandeira coas cores do arco da vella na fachada do edificio e publicar unha foto nas redes cos cancelos #seresentir e #DeputacióndaCoruña como mostra de adhesión e compromiso do concello ou entidade.

# Iluminar, nesa semana, se é posible, a fachada dos edificios locais (no caso dos concellos).

liberdade de ser e sentir

En Galiza, os principios de liberdade e igualdade aparecen recollidos no Estatuto de autonomía, no seu artigo 4.2 recolle a obriga que corresponde aos poderes públicos de «promover as condicións para que a liberdade e a igualdade das persoas e dos grupos en que se integran sexan reais e efectivas, remover os atrancos que impidan ou dificulten a súa plenitude e facilitar a participación da cidadanía galega na vida política, económica, cultural e social».

A lexislación internacional sobre dereitos humanos e múltiples tratados internacionais consagran a igualdade como un principio xurídico fundamental e universal. Desde a Declaración Universal dos Dereitos Humanos, que establece que «toda persoa ten os dereitos e as liberdades proclamados nesta declaración, sen ningunha distinción de raza, cor, sexo, idioma, relixión, opinión política ou de calquera outra índole, orixe nacional ou social, posición económica, nacemento ou calquera outra condición», numerosos textos sobre dereitos humanos e múltiples tratados consideran a igualdade das persoas como un principio xurídico fundamental e universal.

#seresentir

#DeputacióndaCoruña