MENU-DO DÍA é un manifesto, un acto reivindicativo, un espectáculo performativo que fala, de quen somos e do lugar que ocupamos na sociedade actual. Este traballo non se desenvolve dende a impostura, o oportunismo ou o morbo, senón dende un irredutíbel impulso de revolta, sen caer no vitimismo nin na autocomplacencia.
MENU-DO DÍA transita entre as violencias continuadas que sofre o colectivo LGTBIQ+, neste espectáculo servimos un corpo queer en escena, sen máis artificio, xa que estar presentes é ser existentes. Un corpo que se converte nun crash-dummy, un boneco de proba-erro para medir a dureza das carrocerías dos coches, pero a través de experiencias vitais, da violencia que predomina na nosa sociedade e dos discursos de odio que provocan LGTBIfobia.
O concepto artístico que conduce o proxecto baséase na pegada que deixa a violencia nos nosos corpos. A partir dese concepto organízase toda a idea artística en relación ás violencias: a violencia física, a violencia verbal, a violencia política e o recordo da violencia. Máis tamén este traballo, xira arredor da idea da capacidade de recuperación e resiliencia, e da necesidade de amosar que hai persoas que creemos no progreso e na idea de valorar e festexar os dereitos das persoas LGTBIQ+, conseguidos durante tantos anos, con tanto esforzo..